Xune Elipe
En 1974 echaba a andar el colectivu Conceyu Bable (C.B.), que taría activu hasta qu’escomenzó la so decadencia por cuenta de la creación de l’Academia de la Llingua Asturiana en 1980, yá que munchos de los sos dirixentes pasaron a integrase nesa institución. Darréu d’ello C.B., que llegaría a tener grupos llocales estables en tol área central (Uviéu, Xixón, Avilés y les dos Cuenques fundamentalmente) y milenta socios per tol país, diba dir amenorgando la so presencia y actividaes hasta convertise namás cásique nun nome testimonial. Surden entós otros grupos que se dediquen a la reivindicación llingüística de manera llocal (por exemplu, Arfueyu n’Avilés o Andecha Asturianista en Xixón), anque inconexos ente ellos. Ye entós cuando escomienza a vese la necesidá d’una organización unitaria qu’atropara a distintos colectivos, sectores sociales, lliterarios, culturales y/o musicales venceyaos cola llingua asturiana. Nun primer momentu llancen la idea dos escritores qu’entamaben a espolletar lliterariamente daquella, Adolfo Camilo Díaz y Xuan Bello; convócase una primer reunión na sé de la CNT n’Uviéu, a la qu’asisten representantes de delles entidaes y partíos políticos (ENA, MCA, ORT…), amás de persones (enseñantes, actores, escritores, músicos, etc.) a títulu individual. Decídese entós fundar esa organización unitaria y tresversal a la que se-y da’l nome de Xunta pola Defensa de la Llingua Asturiana, yera l’añu 1984 y la so presentación oficial diba desenvolvese nel salón d’actos del Muséu de Belles Artes n’Uviéu un 26 de xineru. La respuesta foi perpositiva y, pasín a pasu, diría estructurándose pelos conceyos, con distintes árees de trabayu.
Estes cuatro décades de xera na reivindicación llingüística amuesen un balance realmente inmensu de bon facer y dignidá d’una organización que güei yá ye tou un fitu na historia d’Asturies. Foron munches les acciones entamaes nestos años: clases d’asturianu na cai, cursos, xornaes de formación, campañes (ente elles la exitosa Doi la cara pola oficialidá), manifiestos, comunicaos, informes, discos, llibros (estaya na que rescampla’l tituláu Llibru blancu de la recuperación y normalización llingüística d’Asturies), conciertos, concentraciones, manifestaciones… Sicasí, hai tres eventos que marcaríen el devenir de la Xunta Pola -como se la conoz popularmente-, ún ye la entrega que fixo bien d’años de los Premios Andrés Solar (dedicaos a la memoria d’ún de los sos militantes ilustres, l’escritor xixonés que morría nun accidente en 1984), que contaben con dos categoríes (Madreña de Purpurina -negativa- y Pegollu -positiva-); otru ye’l Conciertu pola Oficialidá del que se lleven celebraes trenta ediciones y que valió pa crear comunidá ente los y les activistes de la reivindicación llingüística; y un terceru ye la manifestación convocada siempre alredor del Día de les Lletres Asturianes n’Uviéu, que pon el puntu reivindicativu a esa xornada.
Otra manera, esta organización allegal (Delegación del Gobiernu denegó-y la so llegalización por presentar los estatutos n’asturianu) foi la columna vertebral del Pautu pol Autogobiernu y la Oficialidá, que nun momentu dau catalizó’l pruyimientu social de reconocencia de los derechos civiles pa los y les asturianofalantes, con una serie de movilizaciones que marcaron toa una época. El trabayu a nivel de cai ye’l rasgu distintivu de la Xunta Pola, concienciando, organizando, coordinando… pero tamién la creación de sinerxes ente estremaos sectores de la sociedá y el movimientu de reivindicación llingüística (artistes, escritores, músicos, deportistes, etc.). Nun país «normal» con llingües propies la institución académica -nel nuestru casu l’A.Ll.A.- encargaríase de la normativización y estandarización de les mesmes, les organizaciones cíviques llevaríen el pesu de la reivindicación y defensa de los sos derechos, y l’alministración pública -Gobiernu d’Asturies- sería la responsable de la so normalización social. Pero n’Asturies esa normalidá nun se dio en toos estos años, ye más, tuviemos una clas política (gobernantes y oposición mayoritaria) refractaria dafechu hacia’l nuestru fechu llingüísticu. Nesti sen, el llabor de la Xunta Pola Defensa de la Llingua Asturiana foi fundamental pa facer virar hacia posiciones menos agresives a una estructura tan estática como la Federación Socialista Asturiana (FSA), hasta’l puntu d’aceptar la declaración d’oficialidá pa les llingües propies del país. Esti llogru históricu débese al trabayu seriu, coherente y permanente nel tiempu de los y les militantes y activistes d’una organización que ye tou un referente a nivel européu na llucha pola pervivencia de les llingües minorizaes.
Agora que se cumplen cuarenta años de la so fundación, ye de xusticia facer una reconocencia pública de toles persones que dedicaron tiempu, esfuerzu, compromisu y corazón na Xunta pola Defensa de la Llingua Asturiana, faciendo posible que la reivindicación llingüística llegare hasta anguaño. Munches gracies a toes eses manes, nidies o engurriaes, avieyaes o moces, del interior o la mariña, de la ciudá o l’aldea, del monte o la mar… que garrésteis con puxu’l testigu. Yá queda menos pa llegar a la meta.
Fuente: https://www.nortes.me/2024/01/27/cuarenta-anos-de-llucha-pola-supervivencia-de-la-llingua-asturiana/