Y pa ello vamos contribuyir a fortalecela, a promovela, con valores de paz.
Refuguemos la propaganda belicista, nes escueles, nes nuestres cais.
«Toa persona tien drechu a recibir una educación na paz y nos drechos humanos, fundamentu de tou sistema educativu, que contribuya a xenerar procesos sociales basaos na confianza, na solidaridá y nel respetu mutuu, facilite la solución pacífica de los conflictos y ayude a pensar d’una manera nueva les rellaciones humanes».
Art. 2, Declaración de Ḷǃuarca sobre’l Drechu Humanu a la Paz, promovida por AEDIDH: Considerando que
– La construcción d’una cultura de la paz ye un procesu nel que la educación formal tien un papel importante en tanto qu’incide dende les aules na construcción de los valores de quien van ser nel futuru ciudadanos y ciudadanes.
– Les escueles han ser tresmisores de conocimientu y valores positivos, nunca ferramientes de propaganda.
– La presencia del exércitu na escuela ye contraria dafechu a los principios que se promulguen na Llei Orgánica pa l’Ameyoramientu de la Calidá Educativa.
– La educación pa la paz ye un procesu permanente que tien de tener reflexu en tou proceso educativu.
Porque la guerra nun ye un xuegu.
Nos últimos 10 años, el 80% de les víctimes de les guerres rexístrense ente la población civil. La destrucción y l’espantu frañen cualesquier posibilidá de resistencia. La consecuencia inmediata ye la destrucción d’infraestructures, viviendes, recursos, vides… y la población condergada a la fame y la miseria. Solicitar asilu o refuxu -en definitiva, protección- nun país estrañu ye la última posibilidá de supervivencia de miles de persones. Con too y con eso, una Europa cómpliz, una Europa fortaleza, incumple sistemáticamente les sos obligaciones y responsabilidaes xurídiques, dende la Declaración de Drechos Humanos hasta la Convención de Xinebra, dexando na estacada a miles de persones na peor crisis d’esllarigaos dende la II Guerra Mundial.
Destínense millones de recursos pa la xestión y exerciciu de la guerra, la violencia y l’asesinatu, pero nun mos prepararen p’asumir les sos consecuencies, como esta crisis de refuxaos ta demostrando.
El gastu militar mundial medra a un ritmu de más de 1’5 billones d’euros añales.
El gastu militar español total final ye de 17.465 millones d’euros; trés veces superior al presupuestu presentáu pol Ministeriu de Defensa. A ello añádese’l gastu de los Conceyos, propiciáu pol desfile militar del 30 de setiembre.
…porque los exércitos nun son ONG nin muncho menos.
Defendemos el fomentu d’una cultura de paz per medio de la investigación y la educación pa la paz, y tamién una acción humanitaria y cooperación desmilitarizaes. La propaganda del Ministeriu de Defensa ye engañosa, desprende una imaxe idílica de la vida militar y edulcora’l papel de les fuercies armaes españoles nos conflictos bélicos.
Nos medios anuncióse que 120 militares van tomar les cais de Siero arropaos pol alcalde; l’acuartelamientu yá tuvo escándalos públicos rellacionaos col adoctrinamientu de neños y neñes nel usu d’imáxenes con armamentu, que tuvo respuesta na comunidá educativa. La propaganda militar preparada pal 30-S supón una incentivación de la guerra y de los valores militaristes que choquen coles necesidaes cotidianes de la población.
Asamblea pola Paz de Siero.